«Ұстазыма–ыстық ықыласпен..!» салтанатты шарасы өтті.

• 30 қыркүйек 2022
• Оқылған саны: 2538

Бүгін, 30 қыркүйек күні Н. Жантөрин атындағы облыстық музыкалық-драмалық театрында Мұғалімдер күні мерекесіне орай «Ұстазыма–ыстық ықыласпен..!» салтанатты шарасы өтті.

Шараға облыс әкімі Н.Ноғаев, облыстық мәслихат хатшысы, облыстық қоғамдық кеңестің төрағасы, Маңғыстау облыстық ардагерлер кеңесінің төрағасы, облыстық «Аманат» партиясының Маңғыстау облыстық филиалының атқарушы хатшысы, депутаттар, Маңғыстау облысының кәсіпкерлер палатасының өкілі, мемлекеттік органдарының басшылары, «НЗМ» дербес білім беру ұйымы педагогикалық шеберлік орталығының және «Өрлеу» БАҰО акционерлік қоғамы филиалының басшысы, облыстың білім беру ұйымдарының басшылары мен мұғалімдері, білім саласының қызметкерлері, үкіметтік емес ұйымдарының, БАҚ өкілдері қатысты.

Салтанатты жиын педагогика саласындағы жетістіктер туралы бейнероликпен басталды.

Бұдан соң облыс әкімі Нұрлан Ноғаев ұстаздарды кәсіби мерекесімен құттықтап, оларға өз алғысын білдірді.

Облыстың білім саласын дамытып, оның қарыштап дамуына үлес қосып, еңбегімен ерекшеленген мұғалімдерді марапаттады.

Сонымен қатар бірқатар мұғалімдер Қазақстан Республикасының Оқу-ағарту министрінің «Еңбек ардагері», «Білім беру ісінің құрметті қызметкері», және «Ы.Алтынсарин» төсбелгілерімен, сонымен қатар атаулы министрліктің және облыс әкімінің құрмет грамоталарымен, Алғыс хаттарымен марапатталды.

Сондай-ақ, Маңғыстау облысының білім беру жүйесін дамытуға ерекше үлес қосқаны үшін ұстаздарды көтермелеу мақсатында облыс әкімінің қаулысымен жетістіктері жоғары мұғалімдерге 12 бағыт бойынша облыс әкімінің «Маңғыстау облысының білім беру саласына қосқан үлесі үшін» төсбелгісі мен 500 000 теңге көлемінде бір жолғы сыйақы табысталды.

Ерекше еңбегімен еленген 12 мұғалімге Білім және ғылым қызметкерлерінің облыстық кәсіподақ тарапынан Алматы қаласындағы «Көктем» шипажайына жолдама берілді.

Шара барысында мұғалімдерінің назарына Ақжайықтың ақ шағаласы атанған, қазақтың ақын қызы, Қазақстан Республикасының еңбек сіңірген қайраткері, Халықаралық «Алаш» әдеби сыйлығының лауреаты, «Отан» және «Құрмет» ордендерінің иегері Ақұштап Бақтыгерееваның, оқушылардың, өзге сала қызметкерлерінің құттықтаулары көрсетілді.

Мерекелік шара ән-шашумен жалғасты.