"Үздік мектеп кітапханашысы" облыстық байқауы өтті

• 24 қараша 2021
• Оқылған саны: 1587

2021 жылғы 24 қараша күні жалпы білім беретін мектептердің кітапханашылары арасында «Үздік мектеп кітапханашысы» облыстық байқауы (онлайн) өтті. Байқау Білім басқармасының «Балалар мен жасөспірімдерді кітап оқуға тарту, кітап оқуды насихаттау және «Оқуға құштар мектеп» жоспарын жүзеге асыру аясындағы 2021-2025 жылдарға арналған іс-шаралар жоспары шеңберінде ұйымдастырылды.

Байқауға аудандық, қалалық кезеңде жеңімпаз деп танылған 7 кітапханашы қатысып, олардың 3 бөлім бойынша жолдаған төмендегідей жұмыстары қаралды:

- Оқыту тіліндегі электронды портфолио.

- «Мектеп кітапханасындағы жұмыстың заманауи әдістері» - эссе.

- Бейнеролик (Жамбыл Жабаевтың 175 жылдығына арналған шара).

Жұмыстар әр бөлім бойынша алдын ала белгіленген критерийлерге сәйкес қаралып: электронды портфолио ресімдеуде жаңашылдық жетіспеуі; эссе жазуда өзіндік ой-тұжырым, дәлелдемелер келтірмей, кітапханаларда атқарылған шараларды атап көрсетумен ғана шектелуі; эссе бөлімдерінің сақталмауы (ойды қорыту жетіспейді); кітапханадағы шаралардың әлі күнге дейін ескі форматта өтуі, т.б. сияқты ортақ кемшіліктер анықталды.

Барлық бөлім бойынша ортақ ұпай шығарылып, жүлделі орын алғандар анықталды.

І орынды Түпқараған ауданы, М.Әбдіхалықов атындағы мектеп-гимназияның кітапханашысы Бекбосынова Анар;

ІІ орынды Маңғыстау ауданы, Қаратөбе мектебінің кітапханашысы Аймұрзаева Жанар;

ІІІ орынды Мұнайлы ауданы, №14 жалпы білім беретін мектептің кітапханашысы Қартмағамбетова Самал иеленді.

Ал Жаңаөзен қаласы, №22 жалпы білім беретін мектептің кітапханашысы Усербаева Сандуғаш ынталандыру, қалған үш кітапханашы сертификаттарымен марапатталды.