«Әке-шаңырақтың негізгі тірегі» тақырыбында облыстық әкелер форумы өтті.

• 27 мамыр 2023
• Оқылған саны: 1049

2023 жылдың 27 мамыр күні Маңғыстау облысы Білім басқармасының қолдауымен «Samruk Ziatkerlik mektebi» Ақтау қаласы Holiday Inn қонақ үйінде ұрпақ тәрбиесінің даму траекториясын айқындап, отбасы құндылықтарының өзегін тауып, оны біліммен ұштастыру мақсатында «Әке-шаңырақтың негізгі тірегі» тақырыбында облыстық әкелер форумын өткізді.

Бала тәрбиесіндегі өзекті мәселелерді талқылау үшін бір диалог алаңында Ақтау қаласы мен Мұнайлы аудандарынан барлығы 44 әке бас қосты.

Іс-шара барысында отбасындағы әке мен бала арасындағы қарым-қатынасты нығайту, бала тәрбиесіндегі әкелердің рөлін күшейту, тиісті отбасылық тәрбие мәселесіне қоғамның назарын аудару жөнінде пікірталас жүрді. Сонымен қатар, ұрпақ тәрбиелеуде қандай қателіктерге мән бермей жүргендігіміз туралы айтылды.

Қатысушылар «Қазіргі әке: жұмыс және отбасы», «Ұлттық тәрбие – ұлт болашағы», «Балаға арманындағы мамандықты таңдауға қалай көмектесеміз?», «Әр отбасында кішкентай кәсіпкер бар» атты шебер сынып пен баяндамаларды тыңдап, өзара талқыға салды.