Ұстаздар мерекесі 2021

• 5 қазан 2021
• Оқылған саны: 16660

Қазанның 4-і күні аймақ басшысы Нұрлан Ноғаев облыс педагогтарын кәсіби мерекелерімен құттықтап, білім саласына елеулі үлес қосқан ұстаздарды марапаттады.

Биыл алғаш рет Маңғыстау облысы әкімдігінің қаулысымен "Маңғыстау облысының білім беру саласына қосқан үлесі үшін"төсбелгісі бекітілді. Осылайша, конкурстық іріктеу арқылы төсбелгінің иегерлері анықталды. Байқауға барлығы 12 бағыт бойынша 175 педагог қатысты. Комиссия мүшелері мұғалімдердің білім беру қызметіндегі жеке кәсіби жетістігі мен шәкірттерінің жетістігіне баға берді. Байқау ережесіне сәйкес жеңімпаздарға арнайы төсбелгі мен біржолғы сыйақы берілді.

Сонымен қатар, бүгінгі салатанатты шарада облыс әкімі «Үздік педагог» конкурсының жеңімпаздарын, саналы ғұмырын білім беру саласына арнаған ардагерлерді, ұстаздар династиясын марапаттады. Құрметке бөленгендердің қатарында отбасылық ұстаздық өтілі 294 жылды құрайтын Құрмашевтер, отбасылық ұстаздық өтілі 171 жылды құрайтын Бекембаевтар және отбасылық ұстаздық өтілі 160 жылды құрайтын Ордалы Қосайдың жанұясы бар. Үш әулеттен 35 мұғалім шыққан. Мерекелік кеште облыс әкімі педагогтарға алғыс хаттар табыс етті.

Жас ұрпақтың жан-жақты білім мен тәрбие алуына лайықты жағдай жасау – біздің міндетіміз. Президент аймаққа келген жұмыс сапарында Маңғыстау облысының кешенді даму жоспарын жасақтауды тапсырған болатын. Соның ішінде өңірде 35 білім беру нысандарын салу жоспары бар. Жаңадан бой көтеретін білім ордалары өңірдегі мектеп тапшылығы мәселесін шешуге мүмкіндік береді. Құрметті ұстаздар, алдарыңызда бәсекеге қабылетті ұрпақ тәрбиелеу міндеті тұр. Біз өз кезегімізде мұғалімдерге қажетті қолдауды көрсетеміз. «Ұстаз бақыты - озып туған шәкірті» дейді, елімізді әлемге паш ететін талантты да білімді шәкірттеріңіз көбейе берсін,-деді Нұрлан Ноғаев.

05 қазан 2021 жыл

#Білім_берудің_оқу_әдістемелік_орталығы